അശമന്നൂർ
ഗ്രാമ പഞ്ചായത്ത്

അശമന്നൂർ ഗ്രാമപഞ്ചായത്ത് പരിധിയിൽ പ്ലാസ്റ്റിക് മാലിന്യങ്ങൾ ശാസ്ത്രീയമായി സംസ്‌കരിക്കുന്നതിനും പരിസ്ഥിതി സംരക്ഷണം ഉറപ്പാക്കുന്നതിനുമായാണ് പ്ലാസ്റ്റിക് വേസ്റ്റ് മാനേജ്‌മന്റ് ബൈലോ (ഉപനിയമം) നടപ്പിലാക്കിയിട്ടുള്ളത്. ഈ നിയമപ്രകാരം ഒറ്റത്തവണ ഉപയോഗിക്കുന്ന പ്ലാസ്റ്റിക് ഉൽപന്നങ്ങളുടെ നിർമ്മാണം, വിപണനം, സംഭരണം, ഉപയോഗം എന്നിവ പഞ്ചായത്ത് പരിധിയിൽ പൂർണ്ണമായി നിരോധിച്ചിരിക്കുന്നു. വീടുകളിലും വ്യാപാര സ്ഥാപനങ്ങളിലും ഉണ്ടാകുന്ന പ്ലാസ്റ്റിക് മാലിന്യങ്ങൾ ഉറവിടത്തിൽ തന്നെ തരംതിരിച്ച്, തദ്ദേശസ്വയംഭരണ വകുപ്പിന്റെ നിർദ്ദേശപ്രകാരം പ്രവർത്തിക്കുന്ന ഹരിതകർമ്മ സേനയ്ക്ക് കൈമാറേണ്ടത് നിർബന്ധമാണ്. ഇതിനായി നിശ്ചയിച്ചിട്ടുള്ള യൂസർ ഫീ കൃത്യമായി നൽകാൻ എല്ലാ ഉടമസ്ഥരും ബാധ്യസ്ഥരാണ്. നിയമം ലംഘിച്ച് പൊതുസ്ഥലങ്ങളിലോ ജലാശയങ്ങളിലോ പ്ലാസ്റ്റിക് തള്ളുന്നവർക്കെതിരെയും, പ്ലാസ്റ്റിക് കത്തിച്ച് അന്തരീക്ഷ മലിനീകരണത്തിന് കാരണമാകുന്നവർക്കെതിരെയും കർശനമായ പിഴയും നിയമനടപടികളും ഈ ബൈലോയിലൂടെ വ്യവസ്ഥ ചെയ്യുന്നുണ്ട്. പൊതുജന പങ്കാളിത്തത്തോടെ പ്ലാസ്റ്റിക് വിമുക്തവും സുസ്ഥിരവുമായ ഒരു മാതൃകാ ഗ്രാമം കെട്ടിപ്പടുക്കുകയാണ് അശമന്നൂർ ഗ്രാമപഞ്ചായത്ത് ഇതിലൂടെ ലക്ഷ്യമിടുന്നത്.